2Ch 19 | ZomZIV | STEP | Jerusalem a, a kumpi inn ah Judah kumpipa Jehoshaphat bittakin a tun kik ciangin

2 Chronicles 19

1 Jerusalem a, a kumpi inn ah Judah kumpipa Jehoshaphat bittakin a tun kik ciangin 2 amah dawn dingin Hanani tapa thumupa Jehu paikhia-a, kumpipa kiangah, “Migilote huhin TOPA a mudahte it ^{▼▼19.2 Ahikeh pemta suah na hi hiam} ding na hi hiam? Hih thu hangin, TOPA thangpaihna nang tungah tung zo hi. 3 Ahi zongin gamsung panin Asherah khuamte na phiatkhia a Pasian zon ding na lungsimin ngaihsun na hi manin nang sungah a hoih pawlkhat om sam hi,” a ci hi. ^b

Jehoshaphat in Thukhente Seh

4 Jerusalem ah Jehoshaphat teng a, Beersheba panin Ephraim mualtung gam mite lakah paikhia kikin a pate uh Pasian TOPA lamah amaute a hei kik hi. 5 Gam sunga kulha ki-um Judah khuapite ah thukhente a koih ciat hi. 6 Amah in amaute kiangah, “Note mihing adingin thukhen hi loin TOPA adingin thukhen na hi manun bang khatpeuh na hihna uhah limtakin ngaihsun un, thukhenna na piak laitakun amah no tawh omkhawm hi. 7 Tu-in TOPA kihtakna no tawh om ta hen. TOPA eite Pasian tawh thutang lo, mi deidanna le golh-sum lakna omkhawm lo ahi manin kidawmtakin thu khen un,” ci-in a gen hi.

8 Jehoshaphat in Jerusalem ah zong TOPA thukham a zuisak ding le kitotnate a vengsak dingin Levi-te pawlkhat, siampite le Israel innkuan lutangte a seh hi. Tuateh Jerusalem ah amaute a teng uh hi. 9 Amah in amaute tungah, “Note in TOPA kihta in muanhuaitak le na lungsim khempeuh un na na sem pelmawh ding uh hi. 10 Khuapi sunga teng na gam mite panun note mai-ah hong kitun thu khatpeuh - sisan kisuahna ahi-a, thukham tawh kisai thupiakte, thukipte ahikeh ngeina khunsate ah, TOPA tungah amaute a mawh loh nadingun vauhilh un, tua hi kei leh note le na sanggamte uh tungah thangpaihna hong tung ding hi. Hih bangin hih un na mawh kei ding uh hi. ^c

11 “TOPA tawh kisai na khatpeuh ah siampi makai Amariah in note hong uk dinga, kumpipa tawh kisai na khatpeuh ah Judah beh a makaipa Ishmael tapa Zebadiah in note hong ukin, note mai-ah Levi-te ulianin na a sem ding uh hi. Hangtakin na sem un, hoihtaka nasemte TOPA in hong ompih ta hen,” ci-in thu a pia hi. ^d